| 
  • If you are citizen of an European Union member nation, you may not use this service unless you are at least 16 years old.

  • You already know Dokkio is an AI-powered assistant to organize & manage your digital files & messages. Very soon, Dokkio will support Outlook as well as One Drive. Check it out today!

View
 

Chhiáⁿ-mn̄g chok-ka N̂g Chhun-bêng

Page history last edited by pektiong 12 years, 10 months ago

 

Chhiáⁿ-mn̄g chok-ka N̂g Chhun-bêng

by Khoo Poe-bin on Tuesday, May 31, 2011 at 1:29am

 

 

Ji̍t-chêng Chiúⁿ Uî-bûn lāu-su tī N̂g Chhun-bêng sian-siⁿ ián-káng hoē-tiûⁿ giâ-pâi khòng-gī ê tāi-chì, kīn-ji̍t í-lâi thó-lūn gī-lūn moáⁿ-moáⁿ-sī. Chiam-tuì sū-kiāⁿ pún-sin,pit-chiá ū ì-sù thê-chhut kuí-ê būn-tê lâi hióng N̂g--sian-siⁿ chhéng-kàu chi̍t--ê.

 

Káng-chiá ê ián-káng loē-iông sī thó-lūn “Tâi-gí-bûn su-siá chham kàu-io̍k ê chham-siông”. In-uī pit-chiá tuì chit-ê léng-hio̍k sió-khoá-á ū jīn-bat, chai-iáⁿ N̂g--sian-siⁿ só͘ chhián-su̍t ê pún-thó͘ gí-giân le̍k-sú cháu-cheng chin giâm-tiōng. Bô-m̄-tio̍h, N̂g Chhun-bêng sian-siⁿ khó-lêng sī chiòng Hoâ-bûn bûn-ha̍k kèng-bō͘ ê tuì-siōng, sī hui-siông sú lâng chun-tiōng ê chiân-poè, soah m̄-sī gí-giân-kài ê gián-kiù-chiá. Chiū Tâi-gí bûn-ha̍k lâi-kóng, Tēⁿ Liông-uí, Âng Uî-jîn, Sòng Te̍k-lâi lóng-sī chin tiōng-iàu ê sian-hong. Ká-sú to-sò͘-lâng m̄-chai-iáⁿ, gún ē-tàng lí-kái, in-uī Tâi-oân ê bó-gí kàu-io̍k it-ti̍t lóng bô oân-siān ê kàu-ha̍k khoân-kéng chham sî-sò͘. Tuì N̂g--sian-siⁿ kong-khai chiam-tuì Tâi-gí-kài ê chiân-poè piáu-sī chí-chek, pit-chiá kám-kak bān-hun uî-hān. Gún jīn-uî, N̂g Chhun-bêng sian-siⁿ ē-sái phoe-phêng, bô chun-tiōng Tâi-gí-kài ê sian-chìn, soah bô hit-ê bak-tn̂g chiap-siū pa̍k-lâng ê phoe-phêng, iú si̍t hong-hoān; N̂g--sian-siⁿ bô chām-chat tō bô-iàu-kín, Chiúⁿ--sian-siⁿ bô chām-chat tō pì-su pì hun-koah. Chit-khoán chha-piat ê thāi-gū hō͘ lâng chhiong-boán giâu-gî.

 

N̂g Chhun-bêng sian-siⁿ tī ián-káng tang-tiong piáu-sī bó-gí eng-kai tī chhù--lìn o̍h, tī seng-oa̍h tiong ha̍k-si̍p. Būn-tê sī lán ê seng-oa̍h lìn í-keng khiàm-khoat bó-gí ê khoân-kéng a! Koè-khì lán ē-sái chí khò thiaⁿ-kóng chiong bó-gí liû-thoân lo̍h--lâi, tān hiān-chú-sî ê chêng-hóng í-keng bêng-hián chō-chiâⁿ toān-chân. Chit-má lán boē-ēng-ti̍t kan-nā khò thiaⁿ-kóng, nā-sī hi-bāng pó-liû bó-gí, lán pit-su-iàu iōng bûn-jī su-siá gí-giân. N̂g--sian-siⁿ chāi tân-lūn Tâi-gí-bûn kàu-io̍k ê sî, m̄-nā kóng--tio̍h “Bân-lâm-gí” su-siá hē-thóng put-lûn put-luī, sin-chì kong-khai chí-chheng Khe̍h-gí, goân-chū-bîn-gí ê su-siá kan-nā ē chō-chiâⁿ kàu-io̍k ê  chó͘-gāi, hō͘ ha̍k-seng kekhùn-jiáu--ê. Chhiáⁿ chiò-mn̄g chiông-sū bó-gí kàu-io̍k ê sian-chìn tāi-te̍k, chiam-tuì chi̍t-ê būn-tê lín án-choáⁿ siūⁿ? Jīn-uî i ê kóng-hoat kám ū chèng-khak? Kám-kóng chia-ê loē-iông chún-kóng chhò-ngō͘ mā eng-kai pī chiap-siū?

 

Kin-á-ji̍t goá nā iōng Tâi-gí pe̍h-oē-jī su-siá, pò-choá kám-ē khan? Khan--á lín kám khoàⁿ-ū? It-tān siá--á, iū koh beh hō͘ lâng phoe-phêng, “siáⁿ-mi̍h Hoé-chheⁿ-bûn gún khoàⁿ-bô” Kám m̄-sī?

 

Kâng-khoán iōng phin-im su-siá, sī án-choáⁿ Eng-bûn Te̍k-bûn Hoat-bûn boē hō͘ lâng jīn-uî sī Hoé-chheⁿ-bûn? Sī án-choáⁿ chiap-siū “Lán ê bô-gí khak-si̍t chham Hoâ-gí sī oân-choân bô-kâng ê gí-giân, eng-kai sú-iōng bô kâng-khoán ê piáu-kì hong-sek”chit-hō kài-liām, ē chiah khùn-lân? Jīn-uî bó-gí ē-hiáu kóng tio̍h hó ê toā-lâng, chhiáⁿ-mn̄g lín kám-ū chīn-tio̍h kàu-io̍k ê chek-jīn, hó-hó-á chiong ka-kī ê bó-gí thoân hō͘ ē-chi̍t-tāi? Lín ē chham gín-á kóng bó-gí, iah-sī khoàⁿ-tio̍h gín-á tō kap in iōng Hoâ-gí kau-thong? Tī chit-khoán khoân-kéng sêng-tióng ê gín-á, chhiáⁿ lín ti̍t-chiap khoàⁿ chi̍t-ē-á lán sì-kho͘-liàn-tńg; Kám-khài chit-má gín-á lóng boē-hiáu kóng bó-gí ê toā-lâng, lín ê bó-gí kám bô-hó ? Lín kám iáu koh siong-sìn “m̄-bián kà i chū-jiân tō ē-hiáu” chit-chióng hâu-siâu-oē ?

 

Choè-āu, chiū chit chi̍t-kái ê sū-kiāⁿ lâi kóng, ká-sú N̂g Chhun-bêng tāi-su boē-tàng chun-tiōng bó-gí bûn-ha̍k í Lô-má-jī su-siá, koh beh iōng jiá-khang ê káng-tê lâi chham-siông hiān-chāi ê Tâi-gí-bûn su-siá kap kàu-io̍k, khau-sé sú-iōng Lô-má-jī chhòng-chok ê chok-ka, nā án-ne, uī-siáⁿ-mi̍h lán ài chun-tiōng khui-chhuì ha̍p-chhuì gio̍h-sioh bó-gí bûn-ha̍k ê lâng? In án-ne, gún jīn-uî N̂g Chhun-bêng sian-siⁿ eng-kai kong-khai hoē si̍t-lé.

 

 

Khó͘ Poē-bín、Lîm Su-têng

Comments (0)

You don't have permission to comment on this page.